【Viu】JayFung馮允謙噚晚喺紅館完成一連三場個唱，是夜請嚟MIRROR成員Ian陳卓賢任嘉賓，全場驚喜，但都唔夠Jay驚嚇，因為佢喺唱歌時突然出手摸Ian胸，惹全場尖叫，Ian呆咗半秒，其實三年前佢哋同台時已發生過一樣情況，所以Ian落台後就喺社交平台貼出當年遭Jay胸襲片段，十分搞笑！
其實Ian同Jay超老友，佢哋喺台上憶述初次合作，Jay話當時互不認識，Ian笑指：「我識你，但你唔識我。」Jay話只係未互相認識啫！講返今次做嘉賓，Ian話上年Jay開騷時已請佢，可惜當時佢忙於拍劇未能抽身，今次再請必到！Jay話：「我話第二次問你啦，如果都唔得，我就好傷心！佢話： 『Trust me bro，無論點都好，I’ll be there！』多謝Ian，等咗3年再有機會一齊唱歌。」Ian自稱係Jay歌迷，最鍾意《Me and the Moon》，本來想唱，但Jay出場已唱，唯有揀首《DWBF》合唱，之後Ian仲獨唱《地球上的最後一朵花》，快啲睇現場實況啦。
