【viu】梁祖堯、葛民輝、岑珈其、Sica何洛瑤等今晚喺灣仔演藝演出《Di-Dar音樂劇場》尾場，謝幕後仲encore兩首歌，包括殯儀版《火熱動感La La La》，全場high爆企晒起身。
珈其處男舞台劇，頭場同尾場都令佢非常緊張，連Sica亦被傳染。由於珈其嘅角色係鬼，獲額外多贈一道符傍身，佢直言農曆7月14日當晚演出確實有啲心驚驚。珈其亦希望「五膠」一齊嚟睇騷，點知喺群組發訊息竟然個個已讀不回，反而Edan係第一個私訊回覆，令佢有啲感動。
完成34場演出，Sica喺台上已眼濕濕，佢話短期內無得再見大家好唔捨得。對於Sica媽洪淑燕喺《美麗40路》20強不入，Sica爆媽咪已經匿埋咗去深山，講緊嘅係富士山，玩得超開心。Sica直言「跳掣」係遺傳自媽咪，大爆屋企家庭成員說話分佈比例，問到兩母女有冇機會一齊開live，Sica話要先乎合一個條件喎。
至於阿祖係演出期間病倒，要打兩支類固醇開聲。而阿葛就因為要瞓棺材有所忌諱，最後抱住「平生不作虧心事」嘅精神演落去。講到舞台劇中，將唔少經典歌改咗殯儀版，現場觀眾好受落，阿祖指原本同晴天林諗咗10首歌，但有一半未填詞，例如《拜得太遲》、《獨自去開棺》等，希望可以開Season 2，阿葛即爆笑話：「想搞tour去美加，做勻咁多山頭，破地獄都破到腳軟！」快啲睇足本版訪問啦！
