【viu】林峯事隔5年再開澳門騷，呢次更係打破佢自己紀錄開5場，頭場喺前日（7日）順利舉行！好彩演唱會未有受超強颱風「摩羯」影響，但咁啱得咁橋，個騷係以「風」做主題！阿峯先以黑白大褸襯黑色喱士造型升上舞台，第一首歌就唱代表作之一嘅《愛下疚》，全場尖叫聲此起彼落！緊接曲風一轉，配台上用布呈現出「風的形狀」，阿峯帶領幾位男Dancers勁歌熱舞唱出《Hello》！之後阿峯換件黑色透視衫，勁歌熱舞仲跳埋火辣chair dance散發男人味，勢要迷暈台下fans，連擺心心pose都出埋，Sweet爆全場！
首場嘉賓係阿峯嘅死黨Ron吳卓羲，合唱完《別怪他》即肉緊攬攬！阿峯指雖然彼此相愛二十幾年，不過喺影視上合作嘅機會唔算多，仲自爆當年好想將《別怪他》據為己有！而第二晚就請嚟「女朋友」佘詩曼做嘉賓，呢對「情侶」超有默契以all black打扮，襯到絕一絕，合唱《愛在記憶中找你》，梗係全場掌聲啦！
《九龍城寨之圍城》令阿峯登上演藝事業新高峰，個唱期間，「四少」入面嘅胡子彤、German張文傑突然「現身」大螢幕，搞笑話想約開枱，所以FaceTime埋劉俊謙、林峯，German交戲笑話自城寨1987年清拆後，四子都成30幾年冇見，子彤更指「陳洛軍」阿峯揚言要組「澳門四子」，最後城寨四少終於透過視像齊人合體！喺Encore環節前，城寨三子再度「亮相」大螢幕，估唔到呢次有埋「龍捲風」古天樂join in，劉俊謙抵死提議古生嚟做嘉賓唱《林峯的形狀》、《龍捲風的形狀》，笑翻全場！完騷後，寵粉嘅阿峯繼續派福利，特別行出會場外，同歌迷近距離接觸兼selfie！
