【Viu】Aaron郭富城完成13場紅館個唱後直接入後台受訪，心情keep住hyper！先講到老婆方媛帶埋一對寶貝囡嚟撐自己，城城個慈父樣即刻出晒嚟！佢爆大寶唔怕第二朝要返學早起身都嚟撐daddy，兼識背晒成個rundown，冧到城城暈晒大浪！
提到城城喺台上喪騷肌派福利，佢誠實話係有操到嘅，只係冇特別去on diet，驚太瘦上到台冇體力！講講吓佢仲加碼再揭起上衣3次，問到方媛有冇話好正？城城就鬼馬回應啦！
城城指今次開騷最難忘係迷你畫室嗰part，因為真係好難可以喺台上畫畫，佢話係一個大膽嘅嘗試！一共13幅畫作、30幅「您」字字畫、13幅「戲」字字畫、兼城城自爆專登整咗3個銅鑄嘅「您」字，希望將來有機會搞個展覽展出！同時預告下站巡唱係喺年尾12月攻台灣小巨蛋！
對於Rundown上嘅改動，城城指完咗頭場聽到大家嘅聲音，順應民意決定加返《狂野之城》，佢仲話好鍾意呢part solo嘅表演！至於造型上，今次嘗試超多假髮，城城話最鍾意「窗簾」黑髮，點解呢？佢自己又點睇個「公仔麵」頭？即刻睇足本訪問聽城城仲講咗啲咩啦！
