【Viu】張繼聰同Bosco黃宗澤今日喺長沙灣出席《紮職3》盆菜宴，剛喺馬來西亞做完首映嘅Bosco，話估唔到場面咁墟冚，連導演都嚇親，因為拍戲去唔到嘅阿聰表示既羨慕又妒忌。佢哋希望如票房理想，就可以去當地拍返套《紮馬》，一齊衝出國際！
票價方面有好消息，阿聰同Bosco透露呢套戲會推出「與民同樂」價俾大家。講到派福利，阿聰即推浩南哥登場，讚對方係「肌肉界」代表，連戲中浸浴場面都屬浩男哥專利。而Bosco就提議一齊「露毛孔」，真係幾創新。
最近方大同復出推出新歌，阿聰透露跟對方一直有聯絡，兩位跟王菀之、張敬軒曾被外界稱為「香港唱作四小強」，網民都好想佢哋可以再合作，阿聰話都好期待，難得20年後各人仍未被淘汰，其他三位喺音樂都做出好成績，而自己就係樂壇傳說，笑言：「ok，我喺度。」
另外，新人林千渟、黎峻、朱天亦有份參與，戲中兩位男士有好多打鬥場面，朱天更被打到隻眼矇咗幾日，後來發現係視網膜脫落。而林千渟就讚三位「阿哥」阿聰、家樂同Bosco好溫柔，想知更多就要睇足本訪問。
