【Viu】404等了又等！ERROR今年嘅首支團歌《無敵聖衣》今日終於面世，J-Rock曲風配以日系動漫MV，寓意每個人都可以著上聖衣、戴上光環做主角，打做屬於自己嘅成長曲線。打鐵趁熱，ERROR今日上咗電台宣傳新歌，吸引近百名404冒黃雨等候，4子亦近距離接觸Fans，場面熱鬧！
肥仔表示今次轉玩Band Sound係想延續「死腳膠」嘅夢想：「因為平時pop嗰啲喺頒獎禮攞唔到獎嘛，今次就試下行Rock嘅路線。」193就解釋動漫MV係因為自己要出埠拍節目，冇時間拍MV而忽發奇想，好在效果超滿意！
至於Dee哥拆解MV嘅打機Feel係比喻人生，關關難過關關過，只要堅持就唔怕失敗。而MV尾聲嘅「濟典娜」亦係出自「大腦擔當」Dee哥，完美呈現ERROR嘅幽默感！
保錡亦話MV勾起好多回憶：「好似笨豬跳就令我諗起當日《花姐ERROR遊》嘅點滴，真實做唔到嘅時候，就喺呢個動漫MV做到了。希望我哋四個人可以力挽狂瀾，慢慢攀上去，一開始就好似MV入面，大家只係著住紙皮衫，到最後終於有件『無敵聖衣』，慢慢累積level up，同我哋嘅事業一樣！」
此外，Dee哥前日34歲生日，除咗一班「羊群」齊賀「真主誕」外，ERROR亦延續去年嘅傳統，要壽星仔自備蛋糕嚟慶祝，呢啲咪真兄弟囉！
