【Viu】Louie賈思樂將於今年10月喺文化中心自資開只此一場《賈思樂50年 Happy Together In Concert》，除慶祝佢入行50周年，原來仲係佢嘅70歲大壽，冇睇錯，Louie真係好似食咗防腐劑咁Forever Young。訪問中Louie大方公開「不老」秘密，原來跟一位做醫美嘅小粉絲有關，對方一句：「你係我偶像，我唔要你老。」希望Louie永遠都係《少年十五二十》嘅湯家樹呀！
70年代由澳門來港發展嘅Louie，最開心係認識到一班好朋友，佢形容自己「冇乜殺傷力」，真心友多到十隻手字數唔晒，連平時好硬朗嘅Do姐鄭裕玲，喺Louie面前都變咗一隻白兔仔。而最鍾意「試咪」嘅鵬哥盧海鵬，對住講半鹹淡廣東話嘅「蝦仔」亦冇乎，Louie仲爆鵬哥嘅另一面，常跟大姐明林建明鬥嘴，非常爆笑。
不過，人生難免會遇上波瀾，面對好友張國榮、鍾保羅、霞女余綺霞相繼離世，心中傷痛難以言喻，特別係霞女，二人一同經歷澳洲車禍，死過翻生，可惜霞女最終仍不敵癌魔。Louie仲透露當年車禍後不久，同住嘅媽媽離世，雙重打擊下鬱出病，做咗一段時間隱閉中年，幸有廖安麗同狄寶娜·摩亞願意聆聽，寄語大家：「我覺得必須要講出嚟，唔好唔講，你唔講出嚟會喺屋企鑽牛角尖，十分危險。」
十三個兄弟姊妹之中，Louie現在只剩一位姐姐喺美國居住，但仍不覺孤單，因為香港朋友多，今年70歲大壽諗住開開心心搞返個演唱會慶祝，冇期望賺大錢，但如果門票全部售罄，都想幫吓老友廖安麗嘅慈善機構籌款，預告會有四位特別嘉賓，到時送驚喜俾大家！
