【Viu】濤嘅16胎《Every Single Time》MV啱啱上咗架喇，大玩姜Admin最愛嘅黑白Style之餘，仲受張繼聰作嘅曲啟法，大玩「帽子戲法」，又邀得Stephen馮德倫執導，係咪睇到大家嘩嘩聲呢？
姜Admin先感激阿聰寫咗首好歌，又多謝Stephen拔刀相助，兩位仲互笠高帽勁讚對方靚仔，姜Admin話：「有朋友知道我同Stephen合作，已經text我，仲想我偷影，又不停問我真人係咪好靚仔，因為佢哋好想見到Stephen。」
Stephen就大爆姜濤諗法多多，經常半夜三更message自己，仲溫馨提示呢位靚仔後輩，「下次早啲瞓覺，唔好咁夜text我，有時我唔記得熄機，就畀你嘈醒，下次臨瞓唔好諗咁多嘢，同埋唔好飲咁多咖啡。」認真Sweet！
舞蹈方面，姜Admin今次再度同偶像羅志祥嘅排舞老師大目合作，刻意加入咗飛帽一幕，估唔到可以「一Take Pass」，姜濤都直言係歷年嚟最難跳嘅一次。
此外，有眼利嘅Fans發現女聲部份係由Day@COLLAR負責，姜Admin早前感謝嘅「神秘的她」謎底終於解開！
