【Viu】Louie賈思樂將於今年10月喺香港文化中心舉行《賈思樂Happy Together 50年In Concert》，今日記者會獲大班好朋友撐場，小肥、韋綺姍、吳麗珠、彭家麗、夏妙然、蔣嘉瑩、Kelljackie 等輪流送揮春祝賀，不過Louie中文認真麻麻，見黃子雄拎住「要乜有乜」，以為「乜」係「七」，Louie笑言最叻喺麻雀枱上學中文，「東南西北」就難佢唔到。
演唱會選喺10月舉行，因為仲係Louie嘅70歲大壽，佢分享駐顏秘方，透露經常被途人讚keep得好，但接住嗰句令佢有啲嬲豬：「話我真人矮呀，哈哈，呢啲叫一啖砂糖一啖屎。不過唔緊要，我都係俾人開心正面形象。」
今次演唱會仲會幫廖安麗嘅「身前行動」籌款，除主要獻唱70、80年代經典金曲，仲有一啲好有意義嘅廣東歌，同與歌迷互動玩遊戲。Louie預告除咗「蝦仔嗲哋」鵬哥、大姐明捧場，仲有居美嘅家姐會專登返港同Louie 一齊開呢個Happy Together派對，想睇更多就要睇足本訪問。
