【Viu】Sammi鄭秀文第9場紅館騷邀請「陳洛軍」林峯做嘉賓!林峯出場前,Sammi貼心預告呢晚個嘉賓會令fans開心到拆天,仲抵死笑話:「呢位嘉賓最近著火呀,好Hot!總之我細細個就睇佢嘅戲長大啦!好,去歌先!」而當林峯首《愛在記憶中找你》前奏響起,大家就已經估到,嚇窒Sammi:「咁快認得?兩秒咋喎,咁勁揪?」
二人手拖手合唱期間,林峯用手巾仔仔幫Sammi抹走頭上嘅泡泡,又細心又gentle!事後林峯自爆做嘉賓興奮得濟,出發紅館前喺屋企擦損手,又搞笑問Sammi:「網上流傳嘉賓名單,點解今日係『待定』?(梗係唔係啦,假㗎!)我仲睇到個名單有『龍捲風』即係古天樂,其實你好多次演唱會都請佢嚟⋯(假㗎,佢話唔得閒喎!)哎呀!早知頭先同你合唱《今期流行》啦,你又跳得!」仲邊講邊跳咗幾吓經典動作,引全場爆笑!
之後Sammi送上一大碗叉燒飯畀林峯做禮物,林峯則以「陳洛軍」跟觀眾打招呼,獲全場歡呼聲!日前宣布將會開澳門騷嘅林峯,亦趁Sammi落台後把握時間宣傳,同時希望明年有機會重返紅館!最後佢帶嚟金曲《愛不疚》,但呢次唔再「放手」,而係走勻4面台同觀眾握手!
去到encore環節,Sammi再換多個新look見fans,又向fans力推新歌《從前的我們》,大讚好感人!值得一提嘅係新歌MV搵嚟喺電影《瘦身男女》入面,演Sammi嘅鋼琴家初戀男友「黑川」嘅黑川力矢(Rikiya Kurokawa),現名川口力哉。呢對「初戀情人」喺23年後重逢真係終極回憶殺!另外,第9晚嚟捧場嘅嘉賓有Sammi嘅小師妹黃淑蔓、Tim@Dear Jane、方皓文、音樂人蘇道哲、SuperGirls嘅Yanny、Jessica、唐詩詠等。