【Viu】得過「第46屆工展小姐」冠軍嘅鍾雨璇（O3）即將推出新歌《到底邊度有真相》，MV請嚟夏蕙姨同阿儀薛影儀一齊出鏡，呢個組合玩味十足，真係勁新鮮！佢哋每人分飾兩角，夏蕙姨做工人，喺另一時空就變咗超人；阿儀飾演老闆兼新娘；O3一方面係個斯文秘書，另一角色係一個Punk Rock嘅女仔。
聽落都幾混亂吓，其實首歌係講述一個人想擺脫自己過去，重新定義自己，卻陷入自己創造嘅困境，無法言喻自己嘅心聲。O3話：「兩位有一個共通點，就係都能喺人生中開心地做回自己，同首歌想帶出嘅信息好切合。」MV拍攝期間，O3識做地為夏蕙姨送上熱奶茶，即場上契成為夏蕙姨契女。夏蕙姨開心咁話：「之前送過佢金飯碗，借呢次機會正式收佢做契女。」想睇更多呢個組合擦出咩花火，即刻睇片。
