【Viu】Aaron郭富城今日喺尖沙嘴舉行《郭富城ICONIC世界巡迴演唱會 香港站》記者會，宣布8月喺紅館舉行10場演唱會，即席加開3場，並首度播放演唱會主題曲《EXIT》MV。
著住一身型仔皮革外套、戴黑超嘅城城甫出場即獻舞技，透露今次演唱會海報上羽毛造型別具意思，分享佢同一隻鷹喺海中相遇經歷。今次演唱會無論舞台設計、歌曲及舞蹈編排均以全新概念登場。城城表示舞蹈總監Sunny 早前已到韓國取經，仲邀請世界著名頂級舞蹈團Kinjaz合作。講到呢度，都知城城演唱會超過一半都係快歌，不停跳舞，運動量咁大真係少啲體能都唔得，城城話：「想睇下自己體能可以去到幾盡！」佢自爆早前去咗做Body check，結果係「Very Good」呀！
對上一次喺紅館開騷已經係8年前，城城當時仲未結婚同有小朋友，佢話今次感覺完全唔一樣，開騷前要先氹掂兩個女，可能有段時間好耐見唔到爸爸，城城仲解釋點解唔會邀請囡囡上台表演，及親自作曲《您》送俾歌迷，想知更多詳情記得睇足本訪問。
