【Viu】古天樂今日率領「城寨四少」林峯、張文傑、劉俊謙、胡子彤，以及黃德斌、「魚蛋妹」王尹菁、原著作者余兒一齊出席《九龍城寨之圍城》謝票場，電影票房截至6月10日晚上6點，已達99,393,789港幣，為慶祝電影即將破一億票房，「龍捲風」古天樂即場派畢業證書俾「四少」。
古仔今日心情大靚，靚到連派心心都話已經習慣，問到如電影登頂上港產票房No.1會唔會叫四子跳《今期流行》賀一賀佢？古天樂笑言：「唔好搞….我。」佢透露《前傳》同《終章》已有大概藍本，但搭景及跟演員度期，開拍時間表仍未有定案；對於新加4分鐘彩蛋中有已故演員廖駿雄出現，古仔感到可惜，透露二人相識多年，確實要另覓人選取代其角色。
至於「城寨四少」人氣急升，連夾期慶功都有難度，會唔會以男團「Kowloon Four」之名跳《今期流行》？你推我讓之際，年紀最細、今日帶病上陣嘅子彤BB就衝咗出嚟講咗聲：「交畀我！」劉俊謙就即場幫另一BB伍允龍，開出「寸勁」招親條件，仲有林峯老婆最近傳有喜，真係喜事浪接浪，想睇現場更多熱鬧情況，記得睇足本訪問。
