【Viu】一連兩日春浪音樂節今晚開始喺西九開唱，台灣組合五堅情喺尾段出場帶嚟《立刻要爆炸》，全場堅果秒速企起身大合唱！五子大讚香港堅果好犀利、勁熱情，搞到佢哋都好感動！
五堅情話噚日走咗去食酸菜魚，仲玩咗「抽卡買單」遊戲！睇嚟呢個game已變咗「傳統」，次次嚟香港都會玩，而呢次嘅金主就係邱鋒澤，話聽到4位數字嘅金額肉都赤，拒絕今晚食宵夜再玩，超爆笑！
九澤CP月尾會喺九展開騷，鋒澤同陳零九預告會勁歌熱舞，最緊要係會脫！到底會點脫法？有冇嘉賓？佢哋大賣關子叫堅果入場睇騷！講到五堅情入面淨返「小賴」賴晏駒仲未喺香港開過個人騷，佢話希望今年有機會開到，依家籌備當中，咁就真係要期待吓！
「準人夫」婁峻碩指結婚有太多嘢要處理，加上仲要係海外婚禮，又再三講到明因為只限最親，所以冇預4位兄弟份！隔離四子聽到呷晒醋，特別係鋒澤！提起凡凡早前喺Threads留言「懷孕了」，難道雙囍臨門？婁峻碩又點回應？另外，台灣日前發生大地震，黃偉晉坦言係有記憶以嚟最恐怖，希望大家平安！去片睇足本訪問啦！
