【viu】影帝梁朝偉憑《金手指》獲《香港電影導演會2024年度頒獎典禮》頒發「最佳男主角」，事後攞住個獎受訪指有太多人要多謝！佢透露月底就會飛德國拍電影，所以未能出席金像獎，問到對金像獎有冇信心？偉仔簡而精回應：「是但！」追問如果再攞獎，就會係第6個金像獎獎座，偉仔再以兩個字回答：「求其！」笑翻全場！
是夜「最佳女主角」得獎者係Jennifer余香凝，佢返到後台嗰陣先忍唔住爆喊，笑認係delay cry！再指獎項對自己意義重大，被問如果金像獎嗰陣再捧走影后寶座？Jennifer就話冇諗咁遠啦，啱啱有幸同偉仔合照，開心話希望有機會合作！Jennifer再話今晚返去會同囡囡開心share獎項，搞笑踢爆囡囡前日睇奧斯卡頒獎禮嘅片，學影后Emma Stone講致謝詞，真係巧打耳！
