【Viu】《第三十屆香港電影評論學會大獎頒獎典禮》今日舉行，席間頒發5項大獎，「最佳導演」由李子俊《第八個嫌疑人》獲得；「最佳編劇」係《但願人長久》嘅祝紫嫣，同劇男主角、金馬影帝吳慷仁獲頒「最佳男演員」；Jennifer余香凝以《白日之下》奪「最佳女演員」；至於「最佳電影」則係《命案》。
吳慷仁對首次獲頒香港電影獎項感到緊張，謙虛稱未夠最好，呢個獎對佢嚟講係一個鼓勵。除咗上台攞獎緊張，見到偶像杜琪峯、韋家輝都心跳加速，笑話下次有機會同佢哋再見面嗰陣會自薦演電影！
提到佢啱啱農曆新年嚟咗香港，吳慷仁預告之後每月至少一次報到嚟開工，此行唔止食咗佢最鍾意嘅燒賣、叉燒之外，令佢最開心係收利是，仲笑話一日未結婚都照收！問到佢金像獎會唔會帶埋女朋友邵雨薇一齊嚟行紅地毯？吳慷仁未答就已經紅到面晒。
「最佳女演員」Jennifer同樣話攞獎嗰刻好緊張，笑話講致謝辭嗰陣因為見到導演而忍唔住哽咽咗一下！對金像獎競逐影后寶座打咗支強心針？Jennifer直言冇諗咁多，反而係喺演戲上有信心咗！離金像獎仲有一個月嘅時間，Jennifer笑話未諗定戰衣，相反更期待after party！唔知上年行紅地毯公布陀B好消息嘅Jennifer，今年又有冇surprise畀大家？
另外，八部推薦電影，包括《第八個嫌疑人》、《年少日記》、《尚未完場》、《但願人長久》、《白日之下》、《詩》、《金手指》、《填詞L》。
