【Viu】Anson Lo盧瀚霆喺新歌《MY LIFE》MV中，化身折翼天使，表達無論受傷或受挫，都要繼續忠於自己，善待他人嘅概念！AL透露為咗拍封面照狂操背肌，好彩效果好到Woo一聲！佢話：「辛苦係值得嘅，影之前不停提自己唔好偷懶、要狂做Gym。雖然排緊演唱會，又要準備新歌MV，體能上係有啲攰，之前都有喺社交媒體透露自己雙腳好痛，但我都迫自己唔好偷懶，尤其一啲必要做嘅行程，例如學唱歌，呢個係我堅持要做，因為我唔想自己退步；同埋曾經許下承諾唔好咁瘦、弱質纖纖嘛！我成日畀人覺得好似好瘦，所以都想厚實啲！」
教主又預告2024年會繼續做「勤力撈」，繼續挑戰唔同嘅跳唱風格，保證令大家有驚喜咁話！想聽教主親解新歌《MY LIFE》嘅創作概念，記得睇足本訪問喇！
