【Viu】快將92歲嘅「修哥」胡楓、Bob林盛斌今日為私營靈灰安置所擔任剪綵嘉賓，Bob直言即場做埋「顧客」，又抵死笑話買個連位當生日禮物送太太，認真係百無禁忌！至於修修就話其實已經一早安排好後事，冧爆話離唔開太太呀！
今日見修修一嚟就「投訴」Bob開talk show唔預佢，Bob即刻笠水耍冧，場面勁搞笑！咁啱Bob有份協辦修修嘅契仔「歌神」張學友嘅紅館騷，秒邀請修修睇騷，而修修就話起碼睇3、4場，百看不厭呀！又指契仔做一字馬都唔算勁，修修自爆有大絕！講起學友揚言要破契爺90歲開紅館騷紀錄，修修即贈4字真言，好巴閉㗎！
另一契仔黎明早前就開完紅館騷，修修話有去捧場，仲被影到喺台下跳舞，對比黎天王坐喺度唱快歌，修修笑話：「我代佢跳！」另外，周海媚前日（11日）病逝，修修婉拒回應；資深傳媒人「超人」林超榮噚日因血癌逝世，Bob指曾跟對方喺電影上合作，深感可惜。
