【Viu】Ken洪卓立自同「索膠」Hillary劉沛蘅分手後，被揭暴脹至200磅成焦點！Ken今日出席電影活動，解釋增磅係為咗操肌，正進行地獄式特訓，希望明年2月前有成果！
講到佢以「萬事皆有可能」嚟回應同Hillary復合嘅成數，Ken話可能性有好多，依家二人仍然保持聯絡，仲自爆留咗部相機喺對方度。對有傳佢因爛賭而分手，Ken直言呢個係最估唔到，只係一次同朋友買馬中咗就被標籤，不過佢都好大方話唔怕因「爛賭」而影響形象，做番好自己就足夠！
同場嘅Angus楊天宇指最近都有睇《冰上火花》，問到佢係咪撐緋聞女友Ashley林愷鈴？佢就話主要以演員身份去睇角色嘅表現，咁唔知佢對Ashley同Will柯煒林嘅第一集錫錫又點睇呢？Viu Original劇《轉角浣紗街》即將播出，有份演出嘅Angus梗係要大力宣傳！另外，Angus亦正拍攝新戲《怒火漫延》，話要向謝霆鋒、劉德華偷師，唔知煮嘢食了得嘅Angus又有冇同Chef LeMon切磋吓廚藝呢？兩大型男同框，齋係呢個畫面都夠晒養眼！
