【Viiu】今年係梅艷芳離世20周年，歌迷會今日喺旺角舉行《傳承• 永恆傳奇 #梅艷芳》活動，Anita崔碧珈、余震東，仲有曾同梅姐一齊走埠嘅阿銀Sliver Ko 獻唱梅姐多首經典金曲，現場仲展出梅姐兩套歌衫、唱碟及播放生前演唱片段等。剛從法國返港嘅崔碧珈，現場唱《夢伴》時有啲走音，佢直言未試過同觀眾咁近距離獻唱，有啲緊張但滿意自己表現。
對於被內地網媒指介入已離世李玟（Coco Lee）與富商老公Bruce之間做第三者， 崔碧珈話成件事好funny，因為真係完全唔認識Bruce，連對方電話都冇。佢唔覺得自己係「性感女神」，只係「性感女人」。講到前男友吳浩康傳婚變，碧珈話冇留意、冇聯絡，現階段自己感情生活係零，只會隨緣，讚梅姐係女性典範，希望同對方一樣能成為一位獨立女性。碧珈仲有透露未來工作大計，監製、演員、歌手乜都有，想睇更多訪問內容，記得睇足本訪問。
