【Viu】姜濤一連四場演唱會，噚晚喺亞洲博覽館開鑼喇！佢專誠為演唱會打造嘅12胎《濤》揭開序幕，姜admin希望如水多變，為Fans帶嚟多面嘅表演，演唱會上滿滿嘅藝術元素，勁炸台呀！姜濤噚晚特別請咗師傅肥仔合唱《特務肥姜2.0》，肥仔仲細心咁幫徒弟抹汗，又叫佢喺毛巾簽上大名，諗住公售咁話，唔知邊位Fans咁Lucky買到呢條「姜味」毛巾呢？
姜admin喺演唱會，仲送上新歌《好得太過份》多謝Fans們一直以嚟不離不棄，佢又化身「一日姜糖」，凌晨時分喺街度舉燈牌兼尖叫，不過隔咗一陣就辛苦嗌攰，「姜濤好乞人憎！」出道以嚟時刻保持謙卑嘅姜濤，仲話如果自己有咩做得唔好，歡迎「家人」提點。
而Jan林海峰就擔任特別嘉賓，直言等足三年，終於有機會喺姜糖面前補頒「叱咤樂壇我最喜愛的男歌手」獎座俾姜濤。Jan又讚姜糖先係「用作品說話」，唔止為廣告界帶嚟新面貌，仲令廣播道都出現新面貌。佢希望姜濤努力繼續成為「我最喜愛的男歌手」，自己先有機會繼續成為「我最喜愛的男歌手嘅我最喜歡頒獎嘉賓」，Jan連珠炮發搞到姜濤招架不住，全場笑爆啊！
