【Viu】 Sammi鄭秀文最近推出新歌《致我們的夢想》，邀請靚仔新人王Jeffrey魏浚笙合作，仲得到過百圈中好友喺IG story出帖應援，令佢非常感動。今次MV喺台灣拍攝，Sammi換咗四個造型，動員100位舞蹈員，連續兩日喺沙漠、廢墟、水池同巨型銀幕又唱又跳，散播相信夢想，就算喺痛苦低谷都可以綻放驚人力量嘅信念。 Sammi興奮話：「我仲搵咗一股新嘅力量一齊合作呢首歌，featuring部份有Jeffrey魏浚笙，佢已開展緊歌唱事業，係幾特別嘅一次合作。」而Jeffrey企喺天后身邊亦完全冇怯場，仲展現到佢好有活力、真誠嘅一面。原來Sammi舊年已經想搵Jeffrey合作，但直到今年大家先有時間一齊錄歌拍MV。 MV中最後一場，Sammi著上肉色連身衫喺沙漠場景，獨自演繹痛苦嘅狀態，佢仲一度喊到收唔到聲，cut機後心情都未能平伏，佢睇playback時再被感動，又再落淚。而佢喺MV出街前亦喺IG出post為MV導賞：「勵志的歌未必只有正面，而不能有掙扎、有難過、有痛。《致我們的夢想》這歌不想只美化夢想，而是將追尋夢想的『快樂勇敢和痛苦掙扎』誠實表達。」
