【Viu】Alfred許廷鏗同吳林峰完成會展音樂會後受訪，後者笑話心情由緊張變放空，好似發咗場夢咁不在狀態，事前佢自爆中學參加歌唱比賽自視過高唱《螞蟻》被叮走，故是晚專程邀請當年嘅「劊子手」Miss Chin覆桌！而最後Miss Chin係畀咗個手指公出嚟撐吳林峰，但仍然笑話會繼續叮走佢！
「鄰居」Yoyo岑寧兒係嘉賓之一，吳林峰心心眼咁話係佢嘅女神，大讚對方嘅香水好香先最搞鬼！講到佢臨尾同Yoyo攬嗰吓，吳林峰抵死笑話已請示女朋友，只要喺中間隔住枝結他咁話！全晚佢哋揀咗兩首Jer@MIRROR嘅Solo歌《迴光物語》、《離別的規矩》，Alfred讚Jer唱歌方法別樹一格，又指對方曾演繹過佢首《青春頌》，似喺一個平衡時空交流，之後就會去個旅行差差電，返嚟再籌備跨年騷！
