【Viu】「賦豪CP」MC張天賦同Kaho洪嘉豪，噚晚現身亞博音樂祭獻唱，其中MC報稱頭痛又喉嚨痛，怕中招做快測後仍然都係「一線歌手」，更零影響高水準演出。講到日前網上瘋傳男中學生翻唱佢首《記憶棉》，MC指好佩服佢投入200%感情，自post黑材料都係為咗鼓勵對方，真係好有愛！
就嚟開處男騷嘅Kaho話仲有幾日就拍完新戲《超神經械劫案》，之後就專注排練演唱會，咁啱佢日前喺戲組渡過31歲生日，開咗個小型party令佢好開心！提起公司近日為旗下2字頭嘅歌手揼本落巨型廣告，Kaho抵死笑稱冇呷醋，但希望公司可以補番個廣告畀「老年組」！
同場仲有樂隊Dear Jane，早排主音Tim最近同老婆Rabeea二人世界出國旅行惹隊友羨慕，笑問兩個人去、幾多個人返嚟？Tim搞笑答：「有就『嗶』出嚟！」
