【Viu】女團Lolly Talk日前為跳唱新歌《五種愛的密語》拍攝MV，造型行Y2K風格，8女飾演「腦朋友」嚟掌控女主角唔同情緒。MV依舊邀請到唔同嘉賓客串，先有型男Kenji；彩蛋部分就有「繼續用嘴巴說話」嘅男團FINALLY，Sinnie透露原來之前《三分甜》都想邀請FINALLY，不過要去到今次先成事，雖然冇得同框係有少少可惜，但佢哋相信之後總有機會再合作嘅！
最後當然不得不提MV導演Boris啦！係佢今年第三次執導MV，仲要係幫女朋友Elka所屬嘅女團，高調放閃都咪話唔閃死人呀！笑問接拍MV係咪有私心先？佢情不自禁話：「坦白講就梗係有啦！」又感謝女朋友擔當牽線人做介紹，整個拍攝可謂落足心機！
