【Viu】期待已久嘅電影《飯戲攻心》終於喺噚日正式上畫，主角之一嘅明禎BB連跑幾間戲院謝票，真係要頒番個勤力獎畀佢啦！去到旺角站更吸引過百名fans熱情圍觀，搞到明禎BB鬼咁開心又感動！
做訪問嗰陣佢笑話朝早有買飛偷偷入戲院再睇一次，順便參加《飯》嘅中秋金多寶遊戲，但佢竟然話如果抽中大獎會將捐出嚟，之後仲宣布喜訊：「香港喜劇開畫票房第一！」有咁好嘅成績就梗係要賀一賀佢啦，不過要齊人都真係有啲難道，明禎BB透露中秋節可能有機會總動員出動謝票謝足一日，又預告服裝上有少少surprise添！《飯》除咗喺香港上映，仲會去到台灣，咁啱明禎BB中秋之後就會飛去台灣，唔知到時會唔會做代表宣傳呢？另外，佢又講到早幾日去睇咗「男朋友」子華神嘅舞台劇，大叫好有驚喜又震撼，令佢都心郁郁想演舞台劇呀！
