【Viu】方力申今日出席大腸癌篩檢測驗活動，係首次代言同條命有關嘅產品，仲即刻推介畀家人。講到小方啲胸肌迫爆西裝，佢話自己連Gym都冇做，但易肥易瘦，體重上落閒閒哋15-20磅，減咗一個禮拜先著得落呢件西裝。笑問係咪要操肌撼小鮮肉？佢神回：「我大隻嗰陣，佢哋都未出世啦！」講到陳家樂向連詩雅成功求婚，小方話早就聽聞佢哋拍拖，上個月同Shiga開工時，仲問佢如果有人求婚會否即嫁，女方當時仲話事業為重，但大讚兩人郎才女貌。咁幾時到你結婚呀？小方就話遇唔到，又否認自己眼角高，亦相信唔關佢同Stephy鄧麗欣嘅戀情太深入民心事。不過，小方直認同Stephy經常畀朋友取笑，仲不斷send舊合照，自己預咗畀人笑一世，但坦承Stephy係佢生命中重要嘅人。
