《追光吧！》節目截圖
邊個飾演《西遊記》孫悟空最深入民心？相信好多人都會答張衞健，內地綜藝節目《追光吧！》第二季最新一集，張衛健再次以孫悟空造型亮相，除咗馬騮毛頭套毛色變咗少少，基本上同廿幾年前劇中嘅「如來佛祖玉皇大帝觀音菩薩指定取西經特派使者花果山水簾洞美猴王齊天大聖孫悟空」無乜分別！
最新一集《追光吧！》，張衛健甫出場，先講句《西遊記》經典對白「型到跌渣」，之後除下頭套，與韓宇唱跳《齊天大聖孫悟空》主題曲《高高在下》。張衛健喺微博上載片段並留言：「再次戴上孫悟空的頭套，和@韓宇531 一起表演《高高在下》，有挑戰也有收穫。我跳的 (得) 很盡興，希望大家都可以延續悟空精神，更希望所有人和我一樣，不會被任何事限制我們的『活力』」。
《追光吧！》節目截圖
《追光吧！》節目截圖
張衛健曾經喺內地真人騷《我是演說家》上剖白，指當年一名香港製作人曾搵佢拍電影，但開價後被對方羞辱：「記住！如果你臉上沒有毛，你是不值錢的！」，又話佢只紅喺香港，內地根本無知名度。於是張衛健決心出去闖闖，證明自己面上有無毛都值錢，當時仲講明唔再扮孫悟空！
《追光吧！》節目截圖
過兩個月就57歲嘅張衛健呢次喺《追光吧！》再扮孫悟空，自然焫著好記性嘅香港網民，批評佢為賺錢反口，「又話唔扮馬騮」、「當年唔係俾人串佢唔扮馬騮唔會紅跟住先剃頭咩，而家又扮翻 (番) 馬騮啦」、「真•馬騮戲」。
內地和諧嘅網民就留言讚張衛健唱得又跳得，令大家回憶返晒嚟，「好聽好看，故事性還很強，永遠的大聖爺」、「我的童年啊！型到跌渣！」、「還是那麼帥 一點沒變 最帥的孫悟空最帥的張衛健」，兩地網民嘅角度果然好唔同。
Photo / 《追光吧！》節目截圖
