有ERROR 郭嘉駿（193）坐陣嘅ViuTV節目《晚吹 - 戀講嘢》，將於下周二（24日）開播，193將會同另外3位女主持鄭伊琪（浩南）、譚凱倫（Helen）、郭奕芯，一齊以唔同角度分析感情問題，為現場嘉賓提供意見，而首集內容將會圍繞「A0」！
（左起）郭奕芯、193、譚凱倫（Helen）、鄭伊琪（浩南）
「A0」意思即係從未拍拖，呢集節目組請嚟兩位「A0」女仔做嘉賓，分享佢哋同男性的相處方式，而4位主持就嘗試拆解兩人一直單身嘅原因，幫手諗辦法「出pool」，成功拍拖。
郭奕芯回憶中學有好朋友拍拖，男朋友每日接返學放學，令當時「A0」嘅佢大開眼界，「覺得好犀利，咁sweet ，佢哋中二中三已經發展到有性行為。我當時覺得好有趣，呢個境界，真係唔知我幾時先會體會到。」
其中一位女嘉賓談及主動追男仔嘅經歷，Helen就表示自己每次做主動都失敗。浩南分享：「我有做主動，多數都成功一齊嘅，但係主動嘅時候，得出嚟嘅結果，唔係自己想要咁。」而193 就寧願女方被動：「太主動嘅女仔，我會覺得對方好似對好多男仔都係咁，試過好多次，好多經驗咁。我會鍾意自己做主動，我鍾意女仔扮被動，暗示啲嘢，俾signal我，等我知道對方對自己都有好感。」之後193仲同女嘉賓示範「壁咚」，模擬對方同男仔交往嘅情節，浪漫氣氛引來全場尖叫！
