【now.com娛樂】 睇完發嫂講自己當年BB夭折嘅訪問，個心好痛。BB差一個禮拜出世，新生命已走入大直路，本應係父母最期待嘅時候，但一個壞消息，臍帶纏頸，BB未嚟到呢個世界就走咗，呢個落差真係唔係咁容易承受。人越大越覺得做人好難，你永遠唔知個天幾時會俾嘢你，又會幾時攞走？佢俾啲咩你呢？又攞走啲咩呢？係咪等價呢？冇人知。唯一知道嘅係，做人就係咁㗎喇，一係唔好做，要做就要學識睇開啲啦，而其實大部分時間我哋都唔係睇開咗，而只係無可奈何地承受咗。
一個人嘅睇法係好緊要，強逼自己又好，搵個信仰又好，尋找人生意義又好，用時間淡忘又好，到最後你都要選擇睇化，因為唔化係行唔到落去。我哋見發哥發嫂幾十年都咁恩愛，笑面迎人，係唔會知道佢哋都有咁痛苦嘅過去，而又係點捱得過嘅。每人都有個故事，每人都受過苦難，磨難多嘅人承受能力強啲，人生順境多嘅人承受能力低啲，好難講邊種人生比較好，反正我哋只可以活自己嘅人生，比較其實好無謂，而且唔去到終點都唔知結論係乜。有時候睇其他人嘅經歷係有幫助嘅，唔係睇人衰自己會好過啲，而係學習點樣去evaluate一件事。
我都係小朋友嘅父母，完全想像到發哥發嫂當時嘅失望同傷痛。有邊個父母大肚時唔擔心？剛剛有咗，行步路都小心啲，食又唔敢亂食，連咁開心嘅事都唔敢同人講，驚BB小氣。其實呢個傳統智慧，我相信係驚父母小氣多啲，一個唔小心陀唔穩，但已經通知晒所有人，都唔知點樣在咁痛苦嘅時間又要同返大家講冇咗。到陀穩咗，就做好多檢查，其實都係擔心，唔知BB發育正唔正常呢？心臟健唔健康呢？夠唔夠重呢？活唔活躍呢？最驚都係check唐氏綜合症，因為太太剛好算高齡，話機率會比較高，已經淆淆哋，跟住加多句：「冇事就唔會打俾你㗎喇。」之後我同太太都驚咗部電話，驚佢會響呀！同時又要睇住啲營養，希望BB吸收得好啲，臨近預產期，又要擔心準備好未，走佬袋執齊未？如果早咗出世點算？陪月配唔配合到？天氣凍夠唔夠衫仔著？學識餵奶掃風換片沖涼未？所以點解BB嘅第一吓喊聲咁好聽，點解一聽就會感動落淚，係因為如釋重負呀，即使只係輕鬆得幾個鐘，到麻醉藥過咗又有幾十年要捱，但起碼最令人忐忑嘅第一關已經過咗。
而當小朋友慢慢長大，你會發覺小朋友點解唔夠人咁乖？或者唔及人咁叻？你緊張，你唔開心，但真係睇你點睇，因為退返去原點，原來小朋友可以出世可以長大已經係人生嘅恩賜，個天俾咗個小朋友你，而佢冇攞走到，就係幸運，因為佢真係可以好無情。陀BB時我唔係冇想像過如果BB夭折會點樣，係有輕輕地掂一掂，但冇勇氣深入去諗，因為唔覺得承受得到。我覺得學識感恩好重要，人要感恩自己擁有嘅嘢，因為世界上真係有人連擁有嘅機會都冇，但又活得比擁有嘅人更正面。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
