【now.com娛樂】細細個就聽譚詠麟譚校長唱歌，是有種無比親切感，所以日前校長上載了囝囝譚曉風牛津碩士畢業相時，除戥他高興之餘，也有一刻覺得原來校長個仔咁大個，大家彷如變了世叔伯一樣。
可能係校長收得太密實，當大家知道有譚曉風存在時，都已經是個10歲、8歲的小朋友，然後再過多十年八載，便已成為今天的牛津高材生，兼筍盤一個。當日以頂級成績被牛津拔尖，今日以Engineering Science碩士畢業，做老竇的當然開心到不得了，親赴畢業禮之餘更罕有地post相同大家分享喜悅。
事實上，其囝囝不單止讀書叻，據講仲遺傳了校長的的音樂天份……不是，是比老竇更紮實的音樂天份，識多種樂器之餘，又唱得又高大靚仔，相當有吸引力。當然，近水樓台，校長隸屬的環球唱片就曾打主意，希望簽他做歌手，但一一被校長落閘。
如果譚校長不是樂壇校長，真的是一校之長，相信當個仔話想承繼衣鉢，應該會舉腳贊成，心感光榮，可惜這個是娛樂圈，一個有實力未必會成功，但有運氣分分鐘可以賺個盤滿鉢滿的地方。當個仔有本事可以有更好選擇時，你也未必想他冒這個風險。
一直以來，星二代雖然是贏在起跑線上，比普通人更快讓人記得你是誰，或者多一個乜乜乜個仔，物物物個女的稱號，但往後的發展又分分鐘輸在這條起跑線上，既會成為種負擔，也會扼殺你的努力，具無比壓力。就看看謝霆鋒、鄭欣宜兩個實例，今天是做出不俗成績，但起步時所承受的風浪確是比一般新人多且急，一個不小心就可以忍著淚說Goodbye。再者，亦是最重要一點，做爸爸的，仔女的成就正是最厲害的曬命武器，一個不靠父蔭，靠自己闖出一片天的成就，是無價，也值得父母引以為傲。比起繼續靠唱歌跳舞做出成績，確實更耀眼。
文：余健
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
