【now.com娛樂】大台播緊嗰套《射鵰英雄傳》，我只睇了兩三集，屋企人話好好睇，就我睇咗嘅兩三集嚟講，撇除自己向來對大陸劇嘅厭惡，係幾Okay嘅，感覺上跟原著跟得幾足。印象比較深嘅係穆念慈比武招親一幕，連對白都幾乎跟足，呢樣幾好。但唔好當我呢個係對套劇嘅評論，我睇得唔多。
另一樣好，就係重新挑起自己睇金庸小說嘅熱情。劇我已經冇再睇喇，因為已經從書櫃攞返套塵封嘅射鵰出嚟睇，剛剛睇完，?家睇緊第二次了。所謂塵封唔係誇張，套金庸全集我係回歸前買落，買完之後睇過幾冊就冇再睇，我又冇乜打理，所以真係鋪滿塵。好在當時啲書紙質一流，廿年後拍走啲塵，裡面仲好似新嘅一樣，好感動。
仲記得小時候係書不離手，程度就好似?家啲人睇手機一樣，行到邊睇到邊，晚晚睇到唔願瞓。我係睇小說同漫畫睇到近視嗰種書蟲，課外活動除咗打波就係睇書，去得最多唔係同學成日捉我去嘅溜冰場同保齡球場，而係圖書館。
仲記得以前公共圖書館係唔可以預約，續借只能續一次，但我好少續借，通常借一本小說，隔日就睇完。每日放學就跑落去睇小說架，見到就搶，見唔到就去Counter問吓姐姐有冇人還咗書未擺上架。大部分小說就得一套啫，所以我係同好多人搶緊，好緊張刺激㗎。
呢種日子由初中開始直至中學完結，圖書館放嘅小說幾乎都睇過晒，最鍾情嘅武俠小說始終都係金庸，全套睇過冇十次都有八次，其他都有睇嘅，但始終唔算得上鍾意。圖書館嗰種硬皮書裡面夾住發黃嘅紙，打開嗰陣味，揭書粗鞋嘅手感，挑燈夜讀嘅生活，攞原稿紙學寫自己第一篇幼稚小說嘅回憶，呢一切相信到我化灰時都仲會記得。
後來為生活已經唔可以冇節制咁睇小說，節制得幾年，開始唔多睇?，只偶然睇到好電影，會買返本原著睇，或者會睇一啲真係出色嘅網絡小說。強烈推薦冇睇原著習慣嘅朋友，睇戲真係要睇原著，唔好睇小文字，電影拍得幾出色都好，有啲內涵反而係畫面畀唔到你嘅。睇得明原文就睇原文，睇唔明翻譯都好過冇，良心建議。
金庸我已經好多年冇睇，?家叫做稍為重拾吓，雖然已經幾晚唔夠瞓但係爽嘅，個感覺返晒嚟。武俠世界就係要一頁一頁咁揭先會峰迴路轉，經歷過嘅朋友自會明白。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
