【now.com娛樂】《幸運是我》以票房論，應該唔多人睇過，難怪金像獎只得惠英紅攞獎成為話題，但整個頒獎禮其他部分幾乎都被冷待，都冇乜人為意，亦冇做到谷返起部戲口碑嘅效果。一樣係本土片，一樣係新導演，但同《樹大招風》、《一念無明》等有好大落差。
其實《幸運是我》係一部好有heart，但同時又好奇葩嘅電影。上映當時已經想寫，但有啲唔忍心寫得太直，喺原本已經唔會高嘅票房再踩多腳，心諗不如沉澱吓先啦，可能係自己睇唔開呢？但沉澱大半年後，到今日惠英紅攞埋金像獎，感覺依然冇變，套戲一樣好奇葩。
奇葩在電影完全地分裂，好嘅地方拍得極好，差嘅地方拍得極差，唔單止在質素上，更在表達手法同埋觀感上，有種好似兩個導演分開拍出嚟嘅感覺。但向好嘅地方睇，拍得好嘅多，差嘅少，但始終撈唔埋一齊。
電影最好嘅地方，金像獎已經頒咗個獎畀佢，就係小紅姐。其實個故仔好簡單，陳家樂阿媽死咗無依無靠，從廣州落香港搵拋棄佢嘅生父，落泊中遇到獨居老人惠英紅，仲租埋佢屋企間房住。後來陳家樂搵到老竇，但唔認佢，兩個同是天涯淪落人，一個人生目標都冇埋，另一個有腦退化症等待孤獨終老，日日都驚老來冇人照顧。唔可以講係一拍即合，但經時間磨合後，成為一段彷如再世母子嘅關係。
呢一Part好好睇，好睇到不得了，小紅姐固然做到外間對佢嘅高度評價，陳家樂都唔簡單，絕對係佢代表作。好多幕都好震撼，好似陳家樂帶走老竇另一頭家嘅細佬，想嚇一嚇佢，其實係搵存在感，點知到頭來同細佬產生感情，呢一幕好真實，比後來老竇兜口兜面話唔會認佢更真摰。又例如陳家樂見小紅姐屋企電視舊就變賣古董換部新電視返屋企，換來小紅姐歇斯底里嘅回應，腦退化嘅恐懼如海浪一波一波撲向陳家樂，你完全感受到佢嘅無助同擔憂，呢幕幾乎就係全部戲最有張力一場，勁在陳家樂接得住，唔易㗎，我幾肯定，換做余文樂就接唔住。
呢段哎吔母子情好睇在，電影只短短百幾分鐘，但拍得出細水長流。幾次嘅磨擦，然後接納，本來萍水相逢嘅兩個人，一齊生活漸漸如呼吸般自然。而電影差劣嘅地方就係在呢份自然之上，硬加插極端嘅突兀。話說劇情想交代陳家樂重新做人，安排一間社福機構同埋裡面一個靚女社工，畀佢重拾事業同愛情兩大生活元素。問題就在於反差太大，一邊係破舊唐樓中社會陰暗面，一邊係潔白無瑕前途一片光明嘅社福機構，如同最福音嘅福音電影拍法，仲要加個硬滑稽嘅大廚張繼聰。
電影就在現實與Surreal之間不斷穿插，一啖屎一啖朱古力，我身處兩者之間唔知自己食緊屎味嘅朱古力？定係朱古力味嘅屎？想分返開咩？佢又係同一部戲喎，以為係兩個導演分開拍咩？佢又係同一個導演拍出嚟。打個比喻，即是羅耀輝有份提名金像獎「新晉導演」，佢又同時有資格分裂另一個自己出嚟角逐金草莓。
我都唔想踩呢部戲，因為佢可愛嘅地方我極度鍾意，但你明唔明我嘅唔明啊？我唔明點解要咁處理啊！唔知要點樣打呢個圓場，寫完呢篇嘅心情，就好似當初睇完部戲時，嗰種時而驚喜過望，時而又扼腕嘆息，共冶一爐，又再重現。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
