【now.com】話說謝霆鋒拍《十二道鋒味》，出咗條片，學Gordon Ramsay磨刀霍霍整Beef Wellington，點知鏡頭瘋狂穿崩，笑大人個口。
Beef Wellington因為賣相靚，適合請客，好多愛入廚嘅人都挑戰過。我自己就失敗過好多次，淨係件Tenderloin同磨菇輪流出水，都夠你浸濕塊酥皮十次八次。雖然係好難，但係咪代表謝霆鋒唔識整呢？又未必嘅，我都係心地善良嗰類人，仍然相信佢真係識煮嘢食，未必係好叻嗰隻，但點都識啲嘅，起碼Beef Wellington佢應該可以一手一腳整出嚟嘅。只不過，拍出嚟佢唔似識，或者拍到佢好似唔識，我自己都有啲亂，希望你睇得明。
我真心相信佢煮得唔叻係一件事，遇人不淑又係另一樣，加埋就炒到啪啪聲。唔專業嘅廚師請著一班唔識煮嘢食嘅拍攝人員，攞角度就型，整嘢食嘅細節就係零。網民都幾乎列晒出嚟，甚麼向牛扒磨刀增加鐵質（正常人都唔會咁樣為磨而磨）；好好地剝蕉唔得，係要懶型揈蕉（型到盡頭便是＿）；爐頭熄火開火方向都未識分，放牛扒入焗爐又唔順暢（呢啲本來冇乜所謂，但你拍節目吖嘛，係咪應該Take多次，拍到好為止呢？）；整雞蛋仔漏晒漿（又係，點解唔拍到好為止？好趕時間？）；雞蛋仔整出嚟就淋嘅（淋過毛巾真係極貼切，一百分）。
最令我睇唔過眼一幕，係佢打爛一隻碟再兜嘢向鏡頭車埋其他碟度。點呀謝霆鋒，結他你又掉爛，碟你又用嚟車，難道所有嘢打爛佢就有型？唔好傻啦，好幼稚呀！又要學人煮得型，但又淨係學得個外型，煮嘢食係好專注細節嘅工作，拍節目都係一樣，求其拍，不如唔好拍，醜死鬼。
謝霆鋒得個樣都唔止呢個節目，最記得有次佢去破香港整雞蛋仔紀錄，搵咗間小店合作，三千人在維園整雞蛋仔。好啦叫齊Fans再加一批慕名而來想試吓整雞蛋仔嘅人，我朋友都係其中之一，點知蛋漿都未見到，先在烈日下乾煎幾個鐘，曬到就快死之際，活動終於開始，但原來係唔夠爐用嘅，好多人去到根本就冇份整，都係由師傅整完當係你整嘅。咁你一開始就唔好話一齊破紀錄啦，你話嚟圍觀打氣咪得囉，呢種徒具外型嘅精神，完全繼承落佢今次嘅《十二道鋒味》，明眼人一睇就知冇料到，風味欠奉，?味就有，其實可唔可以認真學吓藝先出嚟獻醜呢？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
