【now.com】ViuTV就快一周年，開記招時製作部副總裁金廣誠被問到頭一年蝕錢，蝕成1.8億，呢個問題冇得避免，已經唔係新聞，都講咗一排，好多人見第一年蝕錢，蝕成億幾，即刻指住追問：「喂，又話好勁嘅？又話改變電視格局嘅？咁又蝕咁多？」
世上淡友何其多，只想同佢哋講一句，搞電視台一開始蝕錢就梗㗎啦，第一炮咁大開支，點可能一開台就賺錢，只能夠放長線釣大魚，守幾年真係好基本。而且作為觀眾，個台賺定蝕根本唔重要，最重要係觀眾究竟有冇賺先？啲節目得唔得先？如果得，就算電視台蝕住做，觀眾都唔使老闆上身替盤生意擔心咁多。
總之節目好，觀眾賺得多，就會記得呢個台啦，記得呢個台就會向朋友推介啦，電視台收視就係靠咁樣一點一滴儲返嚟。而且ViuTV嘅目標觀眾比較貼近少睇電視嘅年輕人，確係要比傳統電視台再花多啲力水先得。但點講電視觀眾都係賺咗，唔止賺多咗個選擇，亦開咗眼界。佢哋嘅實況節目可以用豐富嚟形容，只係存貨好似爭少少，但整體質素算高。更重要係令到大台有壓力，好幾次收視都有得贏，?家《晚吹》時段亦成功聚咗一批觀眾，好有發展空間。
睇返記招講下年新節目，林雪主持音樂節目究竟係邊個痴線佬諗出嚟嘅？正喎，我啱睇！諗起雪哥唱歌已經想笑。KB同火火會飛去亞馬遜同當地人玩其實都估到，因為佢哋在香港可以玩嘅都差唔多玩到盡，係時候飛去外面搵新嘢玩，之前《真PK》都好睇，起碼以前冇可能在電視睇到呢類型節目先，所以對佢哋去亞馬遜實在有期待。劇集我自己就冇乜所謂，因為本身少睇，但之前《綠豆》真係唔錯，雖然始終覺得劇集唔係ViuTV嘅主調，但《瑪嘉烈與大衛》係要睇嘅。其實大部分觀眾真係唔會要求一個電視台每晚都畀到驚喜，貼地啲，間中有期待，唔好開親都係冇營養嘅垃圾，就夠了，我覺得ViuTV係做到呢個要求，只係賺錢需要啲時間啫。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
