導演高志森昨日得悉七警案判決後，於Facebook發文力斥法官判決偏頗。（Facebook截圖）
【now.com】雖然唔知會唔會仲有排打，但拖足兩年，七警案終於有裁決，對曾健超襲擊致造成身體傷害罪成。呢單大Case，迴響好大，好似高志森就在Facebook咁講：「黃絲法官偏幫亂港反港份子。本土港獨暴徒縱火、打警察、破壞公物，狗官就輕判、甚至判無罪，實在偏頗至極。」
呢番說話係鬧緊乜嘢，大家心知肚明，Facebook鬧得咁有型，法官鬧到變成狗官，但人哋問返佢，怕唔怕被告藐視法庭？一睇到藐視法庭，大導演即刻好大反應，居然話自己冇一粒字講緊單案。嘩！堂堂大導演，手下幾百人跟佢搵食，玩捉字蝨喎，?家細路仔鬧交咩？
再問多幾句，仲拉晒所有人落水，話香港好多咁嘅聲音，大家都係咁講，佢都同意云云。喂，其實人哋?家問緊你呀，嘈嗰個係你，振振有辭對判決不滿嗰個又係你嘛！頭先咁勁，轉頭你笠水？
去現場打氣嘅七警支持者都唔好得幾多，個個好似坐定粒六會判無罪咁，好彩香港法治未淪陷啫。聽判決一開始話蓄意導致身體受嚴重受傷罪不成立後，即時於庭內拍掌歡呼咁得意，你估?家拍緊《大時代》？轉個頭判襲擊罪成立，就全場靜晒，連預先準備慶祝嘅道具都掉落垃圾桶，反差大到唔知點形容。睇得出呢班人充滿絕對信心打得甩先至嚟，完全冇準備過打唔甩咁點算？結果真係打唔甩，幾肉酸。
被告七警又係，又要打，又要唔認，由頭到尾拒絕認罪，但判完又走去求情，咁你哋當初又唔認嘅？喂你打得咁過癮，打到警察形象蕩然無存，唔使還㗎？大家都期待緊一個合理判決。
做人真係唔好當風吹向自己嗰邊時，就型到盡，留返少少餘地好啲，幾時風向調轉吹，跌落地嗰下都冇咁肉酸吖，係咪先？
導演高志森昨日得悉七警案判決後，於Facebook發文力斥法官判決偏頗。（Facebook截圖）
及後有傳媒報道指高志森言論涉嫌侮辱法官，他隨即於Facebook再留言。（Facebook截圖）
高志森導演（左）向來都有於社交網站，大談自己對社會時事的看法。（Facebook圖片）
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
