【now.com】呢個時勢，反對聲音不停被打壓，粗暴干擾有，陰啲陰啲亦有，連香港電台製作，放在無綫播嘅兩個歷史悠久節目《頭條新聞》同《城市論壇》，都不能倖免。前者由星期六晚上7點黃金時間，改到星期五晚上6點播；後者直接從節目表移除，無得留低，原時間會重播旅遊節目《快樂地圖》。無綫同時會推出自家製論政節目《周日龍門陣》，安排於周日上午11時播出。
突然唔播《城市論壇》原因不明，可能覺得星期日睇《城市論壇》維園阿伯鬧政府太燥熱，所以推出《周日龍門陣》，俾幾嚿梁粉你降降火啩？不過火氣呢樣嘢唔係搵啲涼嘢壓住就得，一要搵返個起因，冇改善個起因，香港人一樣會咁燥底。二要有渠道宣洩，唔係啲毒瘡唔爆出嚟就唔熱氣，等緊機會啫。
至於《頭條新聞》不嬲都係政府眼中釘，大聲鬧佢冇咁驚，你鬧佢即係你搞事，你知香港人最鍾意以和為貴，鬧人一定蝕章，總之長毛擲蕉就一定係衰人，維園阿伯大聲一定係冇禮貌。反而脈絡清晰嘅嘻笑怒罵就好有市場，點醒唔少懵盛盛嘅香港人，等佢哋以趣劇形式理解到政府有幾荒唐，易消化好多。
兩個節目，一硬一軟，發揮監察政府作用，係普羅市民理解事情另一面嘅渠道。政府當然唔喜歡咁樣被監察，一條屎橋度得咁辛苦，兩個節目就篤穿晒，仲要係自己俾錢，真正自己搬石頭砸自己隻腳，痛都事少，唔順氣事大。
《城市論壇》80年開始播，除了抖暑，36年來逢星期日中午準時在翡翠台直播。一個36年來風雨不改嘅節目，突然要改，你話冇目的，邊個信？有人話唔係喎，而家香港電台有自己免費頻道，搬返去播有乜分別？當然有分別，港台電視本來就有播，即是本來兩邊播，而家得返一邊，變相cut咗一半。其實唔止一半，《頭條新聞》早兩年都曾經搬過去亞視播，收視低到慘不忍睹，港台電視可能更少人睇，而且仲有好多區域未接收到。做一個調動，一下子少咁多人睇到，之後大條道理順手cut埋個節目，咁就36年金漆招牌一朝喪，政府又聽少好多人鬧。
《頭條新聞》都被搞過好多次，今次調到星期五晚6點，都真係千挑萬選嘅好時段，新聞都未播，電視都未開，打工仔等緊放工去happy hour，師奶在廚房切緊菜都未落鑊，阿伯仲在公園捉緊棋將緊軍，我覺得度得出呢個時間嘅人好有智慧，並非泛泛之輩，一定非常歹毒。
最重要係以自家製論政節目《周日龍門陣》「滿足」《城市論壇》的觀眾，見到陳建強個名，已經「梁浸浸」。喂，幾時播埋《高志森微博》？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
