【now.com】創作歌手姜麗文（Lesley）曾為陳慧琳寫過《So Hot》，歌神陳奕迅（Eason）作過《主旋律》，今次Lesley再進一步，成為首位寫K-pop主打歌的港人，為韓國男團2PM的新歌《Promise（I’ll Be）》作曲、填詞、監製、錄音兼和音！
「我同2PM係好熟，最熟係Nichkhun同澤演，成日都會分享自己寫嘅新歌，互相鼓勵俾吓意見。之前佢哋話今年會有新歌，問我想唔想參與，咁我就飛去韓國同澤演一齊寫咗《Promise（I’ll Be）》呢首歌。」雖然係受2PM邀請，但Lesley都要過關斬將，作品完成後，經過了2PM所屬的JYP娛樂多次開會商議，過程慢長：「知道揀咗我哋首歌入CD，我已經開心到飛起，跟住再等多三個禮拜，佢哋竟然決定用我哋首歌做主打歌，我喊到黐線。」
知道消息之後，Lesley捉埋爸爸秦沛飲酒慶祝。哥哥姜文杰（Benji）對妹妹實現這個大project，都感到非常驕傲：「妹妹真係好努力追尋自己嘅夢想，我哋兩兄妹雖然一次又一次面對困境，但我哋都好振作、好努力。我會祝福Lesley，預祝《Promise（I’ll Be）》嘅hit rate突破3億，犀利過我首《在一起》，哈哈哈！」
姜麗文專程去到韓國撐好友。
姜麗文同澤演（右）份屬友好。
專輯發表後，澤演亦都將要入伍。
見到女兒成功，秦沛都笑得好開心！
