【now.com】ViuTV節目《晚吹－一大一路》昨日播出訪問劉慧卿的一集，對住幾位小朋友，卿姐一樣好好火，怒斥三屆行政長官，先重提董建華對她說「你唔好講咁多嘢啦，你退一步，唔係，你退三步啦。」卿姐即扯火：「有冇搞錯！民選議員要退三步，唔好講嘢，你話死唔死？」
其後又話：「曾蔭權最衰，咁多年佢唔肯起樓啊，豈有此理，佢話驚拖冧樓市喎！梁振英仲衰，佢上任之後話好似捉盤棋，盤棋咁爛點捉啊？你而家做咗行政長官走去話畀人聽盤棋好爛？鬼可憐你啊！即刻落台啦！」
之後她又取笑葉劉淑儀，扮她因政改「甩轆」沒投票一事而在電台訪問中落淚，更說：「投唔到票走去喊喎，真係死得喇。」笑死一班小朋友。
立法會主席曾鈺成亦被卿姐點名指責：「我同佢講不如一齊合作做啲民生嘅嘢，佢問做邊啲，我話我哋民主派議員有張清單廿幾三十項，我哋大家都同意，我而家畀埋你，你同政府、保皇黨講啦，如果大家都有共識咪合作囉。曾鈺成冇再返來搵我，但係今年一月佢做訪問時話政府同建制派冇人支持我嘅講法，因為嚟緊有好多選舉，所以北京、特區政府、建制派唔想我哋民主派得分，所以唔肯合作！」
劉慧卿在ViuTV節目《晚吹－一大一路》接受一班小朋友訪問。
對住小朋友一樣唔收火。
又扮葉劉喊。（影片截圖）
笑到班小朋友卡卡聲。（影片截圖）
