【now.com】藝人黃子恆涉嫌捲入裕美與老公林恩浩（Jason）結婚的婚變風波，早前更被傳媒影到和裕美逛街市，更被影到裕美上男方屋企過夜，被指偷食。裕美其後更拍片上載Facebook，講述離婚原因，及後更有傳言指有人疑遭家暴。今日下午，黃子恆透過Instagram拍片回應事件，指自己大半年前認識裕美，更指當時自己未清楚對方與老公的關係。
今日下午3時左右，黃子恆於Instagram上載兩段影片，長約兩分鐘。黃子恆於影片中先向大家道歉，又話事件令不少朋友擔心。黃子恆續稱自己知道裕美大半年前已跟老公分開並搬到朋友家暫住，更說想保護及支持裕美，黃子恆說：「我大半年前喺公司認識裕美，從佢口中得知佢同老公分開咗，喺朋友屋企住，當中牽涉一啲家暴問題。當時佢唔敢同人傾訴，我了解佢嘅處境之後，好想保護佢、支持佢。而事情發展到呢步，我知道已經影響咗公司、影響到其他人，若然公司就此事對我有任何處分，我甘願承擔，一人做事一人當，而外界對我嘅任何批評我都甘願接受。」
黃子恆又承認自己於事件上有過失，片尾更希望裕美活得開心，他說：「喺整件事入面，我的確有錯失嘅地方，就係無清楚了解佢同佢先生嘅關係清楚咗未。裕美係一個好善良嘅女仔，我唔希望他日見佢仍活喺陰霾之下，而係開心、愉快、安穩咁生活嘅一個女仔。」不少網友就留言讚子恆真男人，但有網民心痛他挺身護花，將辛苦建立的正面形象催毀。
藝人黃子恆今日下午上載兩段影片，同大家交代事件。（Instagram截圖）
日前裕美亦曾經上載影片，解釋自己離婚原因。（Facebook截圖）
黃子恆（右）於圈中浮浮沉沉多年，形象正面，近年工作機會不斷。他今日於影片中表示若果公司因此而有任何處分，他願意承擔。（微博圖片）
