【now.com】繼狄易達之後，又爆出一單以慈善為名，要求免費表演嘅事件。我相信日日都有呢啲事發生，慈唔慈善都一樣，只差在有冇人公開講出嚟。
其實點為之慈善活動呢？就係你唔想捐自己錢，但又因為一啲原因想做善事，於是搞個活動出嚟募捐，扣除活動開支後全數捐出。講緊搞活動，就要有手腕，想目標高啲，手腕就要再強啲，即是做生意一樣。
哦，做生意，咁就易啦！香港人做生意開源唔算特別叻，總之乜都搞大佢，好好睇睇，自然引到人俾錢；但節流就係世界級，做慈善好吖，冇最低工資阻住晒，又唔使交稅，只要飲管有咁粗得咁粗，冰有咁大嚿得咁大嚿，明星有咁紅得咁紅，使費有咁平得咁平，實掂。而家全香港都咁做生意㗎啦，要降低成本，咪將成本轉嫁落下家囉！
通常大明星都唔會同你計酬勞，亦唔係志在你個airtime，人哋可以係真心想做善事，亦可以係發財立品做個正面形象。總之，佢搵夠，想做善事就做善事。但其他地位低微嘅蟻民呢？例如一啲獨立表演者，佢哋可能都等緊有人接濟吓佢哋，或者期待緊有人捐錢振興佢哋個行業。但在高高在上嘅人眼中，佢哋擺尾乞憐想求個機會，但事實係，佢哋大部分只係想要合理報酬，用自己能力搵食。
然後就會話：「但而家做慈善喎！你有冇善心？」處於金字塔底層，其實經常都聽到好多荒誕理由，例如「我哋今次真係冇budget」、「今次幫幫手，下次有錢嘅一定搵返你」、「你咁怕蝕底唔會紅」等等，聽得太多，都唔爭在聽埋你嗰句。呢啲說話，最弔詭係同你講嘢嗰條友，自己係收足錢做嘢嘅，同一個活動，佢嗰份就係工，你就係義工。佢咁有善心，點解佢唔自己做義工，然後俾錢請你表演呢？
「哦，因為我上咗岸，已經唔需要一個機會，你捉住呢個機會，你遲啲都得㗎。」如果佢咁講，已經算係幾坦白。不過咁，時代唔同喇，以前係有錢都怕冇渠道發聲，而家係太多渠道發聲，但冇錢。所以你嗰套，收返埋留俾你自己啲仔女用啦唔該。
你想人免費幫你做嘢，其實唔係免費，而係貼錢幫你做。排練要時間，搭車要錢，器材有壽命，仲有時間成本機會成本。你簽咗電視台就話冇job接要坐喺度運吉，我做freelance隨時都可以有嘢做，仲要留好多時間來應付你呢類人呢？十個電話打來九個都搵笨，都不知幾忙。
吓吓講錢係市儈咗啲，咁不如講尊嚴吖。可唔可以唔好擺出一副施捨嘅姿態，好似豪個機會俾人上咁，唔做大把人排隊爭住做。條隊又唔係我要排，而家係你唔理條隊，無啦啦走嚟搞我，咁你都好應該好聲好氣求吓我，氹吓我，或者都會可憐你考慮幫吓你手，呢啲，就係真正出於表演者嘅慈善喇！
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
