【now.com】為了抗衡政府的粗暴施政，泛民議員的拉布戰可謂愈打愈成熟。不過建制派也開始各出奇謀，諗盡方法去剪布，早前便有盧偉國議員建議主席曾鈺成在點人數時，點埋缺席議員的靈魂，就夠晒詭異。打擊剪布要落力，但射波呃假也要落足勁。日前有「鼠王芬」之稱的立法會議員梁美芬，便在九龍城區議會會議上，動議議員以後出席會議最少45分鐘才計入出席記錄的安排，改為露一露面即可計算。
如果說香港已失去言論自由的話，實在是放屁，你看梁議員這番話，在欠缺基本邏輯和常識下都可以公開發表而不臉紅，你便感受到香港正享有前所未有的言論自由，大個大個屁從口中放出也無傷大雅。既然有言論自由，自然可接受反對聲音的扣殺攻擊，「暴龍哥」鄭中基得知這建議後，立即在facebook反問︰「老鼠，如果露一露面都算出席？咁喺你面前揚下啲錢係咪算出咗糧先？」一句便成功堵塞在排出臭氣的渠口，功效顯著。如果你係老闆，有個員工返工最大嘅心願就係可以放心射波，咁你炒唔炒？炒，一定炒啦！咁各位當日俾票送佢上區議會的黃埔區街坊老闆們，你而家知自己請咗個咩員工幫你打工啦？
其實暴龍哥發功已不是第一次，一直以來他都路見不平，但跟黃秋生那種怒罵有點不同，他專揀發表膠論的人攻擊，而且不在乎咬文嚼字，但求好似暴龍咁一大啖咬落去求個痛快，一句直達盲腸！就好似創科局局長楊偉雄的見Steve Jobs論，暴龍哥便留言︰「你哋有冇見過一個人講嘢唔經大腦，因為佢冇腦、onX無極限、X到漏汁，又話講緊廣東話，但冇人聽得明嘅創科局局長？我見過。我真係見過。」
另一最近發表暴徒要射殺的「新界關注大聯盟」發言人何君堯，在上年5月便在《城市論壇》上，自稱社會工作者，結果原來所指的「社會工作者」是「社會上工作的人士」，並非大家理解的註冊社工。咁膠，暴龍哥一索到陣膠味，便立即吼叫︰「何律師話喎，社會工作者 = 社會上工作，咁超級市場做嘢嘅人咪 = 超人？」不得不寫個服字俾暴龍哥。
其實暴龍哥的怒吼，大多針對那些將無知歪理講到理直氣壯的異類，相反若你連聽到這些膠論都依然無動於衷的話，咁你都可以做暴龍，是真暴龍，那種望住個人唔郁就當唔存在的史前恐龍。
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
