【now.com】Twins一連五場的紅館演唱昨晚完結，個唱舉行以來，Facebook上都有大大小小程度的洗版，雖然引發點各有不同，但共通之處離不開四個字︰「集體回憶」。有憶起15年來的往事，有想起在K場內大哭大笑大唱的日子，甚至有人想起未有串流，用MP3軟件Win amp聽歌的年代，大家都多謝Twins，剎那間將時光倒流。
吳業坤能夠一舉連贏我最喜愛的男歌手和歌曲大獎，切實地講俾大家知一個道理︰做歌星觀眾緣好緊要，得民心得天下。至於Twins這五晚的功德無量，就似要講多樣道理俾大家知，做歌星最緊要俾到樂迷有回憶。
15年不算長，捫心自問，這些年來你有沒有一刻藐過Twins？理由可以很多︰女子組合死梗啦、咪又係得個樣、唱歌走晒音、都聽唔到歌詞唱乜、首首都好似兒歌咁、仲打埋側手翻？玩雜耍咩……可以好無理的，但那刻又講得大條道理。而當這一切罪名伴隨作品，經過十數年的時間沖洗後，神奇事便會出現。再次聽番那批歌，你會難以置信地覺得點解首首都好聽咗咁多？其實這些歌在封存過程中，你會無意中加入兩茶匙歡笑、半湯羹失意、三滴失戀，仲有少少帶澀味的橙皮，才放入雪櫃。而在不知何年何月的今天拿出來一嚐，再冷冰冰的嘲諷，今天吃下去，都會有股神奇的暖流直湧心頭。過往認定是全宇宙最膚淺的歌曲，今天卻由淺入深鑽進心底，成為勾起你感受至深的每句話。而這道菜就叫集體回憶。
經過多年的磨練，Twins的歌藝或多或少是有進步，但始終不會達至大家心目中的歌后級別。偏偏這種瑕疵口感，又比零瑕疵演繹多一份貼地，就似昔日K房中的你我。阿Sa早前在台上將《女校男生》一句歌詞「然後買襪買衫可以大家揀」唱錯成「然後買襪買衫可以做風紀」。換轉發生在15年前，評語大致係︰「咁都上到紅館呀？」但今天，大家不單沒責怪，惹來歌迷捧腹大笑外，也為社交網絡提供了一個新Hashtag，成為一則熱話。原來回憶內含包容，多謝你為這段舊記憶添新一筆。
其實聽歌同揀男神一樣，都是講Package，講旋律、講唱功、講歌詞、講形象、講態度，若加埋回憶，就是一個完美的Package。
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
