【now.com】半個月前，網絡負皮王梁烈唯跟某雜誌做訪問時，對網民作出自殺式挑釁，說他們膚淺，又直認自己係擦鞋，你吹呀！最後還語重深長地說︰「你一日淨係對住個電話、電腦，你呢一世都買唔到樓喇！」
歪理當真理，妄言當敢言，結果已是負皮王的他，不止繼續稱王，還成功將自己昇華到負資產級別。不過奇就奇在，當事人已去到這種自毀層面，但亦引來信用咭公司肯真金白銀邀請他做代言人。結果在早幾日，掀起一輪剪卡潮，既表達對廣告主角的不滿，亦間接鄙視仍敢找他工作的商戶。或許商戶會話，廣告籌備多時，實在猜不到他的人氣會急轉如此。那麼到底找梁烈唯拍一輯硬照廣告要籌備多久？一個月？兩個月？還是一整年。
假設是一個月，我們回帶到十月初，TVB原本正在籌備新節目《男人經》，由梁烈唯、金剛與王貽興擔任主持，以清談及旅遊為主題，準備接棒《今晚睇李》在星期日播出。結果因為唯唯負評實在太多，為免他拖累新節目收視，故突然急煞車，只是TVB高層余詠珊硬著頭皮澄清，節目仍在籌備中。連親生阿媽都唔攬佢，旁人真係何必多事呢？
一個月太倉促，起碼兩個月啦，實在預計不到他負評這麼厲害！我們又回帶到九月初，有網民在高登發帖，標題為「大家點睇梁烈唯，唯唯？？」當時唯唯未有犯太大的過失，最多都是跟風在9月3日抗戰紀念70周年中，擺出向抗日老兵致敬手勢。雖有微言但未算火熱，所以此帖純粹開個題目大家傾下，殊不知這個話題在平淡中湧出巨浪，各人都將內藏的怨憤如排洪般，一時間洩射出來，短短一星期，該帖已獲超過15,000個負評，令唯唯明正言順榮登「負皮王」之位。無事無幹都可以爆出狂潮，可見這位仁兄的觀眾緣好極有限，找一個沒觀眾緣的藝人賣廣告，有如倒錢落海。
冇！冇！冇！我們的廣告計劃周詳，宣傳活動早在一年前開始落實。那麼我們又看看上年8月，萬寧找梁烈唯拍新一輯電視廣告「香港人想點？」結果出來反應其差，不單有網民說破壞了之前劉青雲、古天樂做代言的格調，也惹來慳皮之嫌。所以廣告播了一段時間便靜靜地下架，而這個現象早在一年前蘊釀。
事實告知你，信用咭公司這次公關大災難，其實早就有跡可尋，可以避免。梁生的人氣急瀉訊號，早在一年前明確告知大家，訊息比美國宣布加息時間更明確，比香港股市樓市下跌的先兆更清晰易明，奈何仍有客戶願意赴湯蹈火下一重注，唯一解釋是客戶看到唯唯有其隱藏的無限商機而我們看不見。他們可能不是追求有實質回報，只需要口頭嗰隻，再加超過45個家庭Like同Share呢個廣告就夠。現在的確超額完成，恭喜！又或許正如唯唯所指，我們實在太膚淺，根本就唔知人家公司個架構係點。始終做生意要有生意頭腦，咩都睇錢，唔識睇長遠，點營運？再者以唯唯的思維推想，你以為剪幾張卡，幾個Dislike就阻礙到成個宣傳計劃嗎？唔會囉，因為我哋唔係活喺網絡世界，係活喺現實世界嘛！我今日話俾你知：我係拍廣告呀，你吹呀！？你咁叻你拍個俾我睇下吖！你一日淨係對住個電話、電腦，你呢一世都唔好話買樓呀，申請多張信用咭都冇可能呀！到時唔好又鬧個政府衰，經濟差喇！
把申請一張信用卡的資格，等同於上車買到樓那麼高不可攀，那麼曲線提升信用卡的尊貴程度。這，就是我們看不到的無限商機。
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
