【now.com】大台套《張保仔》，真係越睇越火滾。首先《張保仔》條橋係抄嘅，明明就係鄭中基拍先，只是改了名做《神秘寶藏》。本來同樣係張保仔，一齊拍好難講係抄，問題是鄭中基版本，一樣係拍穿越，不單題材，一個唔該都冇連條橋都抄埋開劇集！但人哋大台，你又吹佢唔脹。而且唔係第一次了，上次林超賢開《破風》，又被抄橋拍成《衝線》，好多人冇睇，以為《破風》係《衝線》的電影版呀，陰功。
抄橋，仲要搶頭啖湯。《張保仔》早過鄭中基《神秘寶藏》起碼幾個月，上次又係一樣，《衝線》早《破風》5個月播，林超賢想要的單車熱就足足cool down了5個月，一下子怎翻熱？拍劇時間短，想早過人推出，一定做得到，隨時人哋煞科才開拍都可以追得到，電影要做後期又要拍院線嘛，先天已蝕底。
搶頭啖湯，仲要冇誠意。鄭中基搵男神黃子華做張保仔，你出個洪永城，差天共地。最初用黃浩然都窄窄哋，唔upgrade之餘仲要downgrade？
冇誠意，仲要拍得差。連黃秋生都忍唔住批評，導演冇盡到責任提醒陳凱琳，令佢小動作過多，開槍戲表現「猙獰」，對整個演出感到被滋擾。秋生講得好有道理，觀眾眼見的只係陳凱琳演出不好，但其實教佢做戲，甚至選佢去做戲的人責任更大，佢唔應該受晒所有批評，而且根本只係所有問題的冰山一角。
拍得差，仲要錯資料。一個清朝宮女，已經識得講「卧底」。我知，這些漏洞在劇集好常見，「同朕check吓」就係最佳例子，但錯誤係唔應該被習慣的，而且穿越劇對白唔跟足歷史，就唔夠真實感，人人講說話都同現代人一樣，仲穿乜鬼越啫。
錯資料，仲要唔合理。有集講張保仔落海捉海鮮，陳凱琳落埋水，驚覺以前香港海底原來好靚，呢個訊息幾好，本來值得一讚，問題是之後兩個人冇氧氣樽，居然可以潛入深海睇珊瑚睇足5分鐘，未免太過將觀眾當成白痴吧。仲有，陳凱琳入了水龍捲，出番來後可以全身乾爽滴水不沾，有時真係俾少少誠意好唔好？
做人嘅嘢，其實都唔想一面倒踩到盡，問題是未用腦睇已見到一籮缺點，抄到橋都唔識脫角，結果每次都又要睇又要鬧，根本就冇得揀。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
