【now.com】我唔明點解可以將狗肉食落口，正如當初播《天與地》，觀眾都唔明，點解鼓佬、Ronnie同黑仔可以食咗家明一樣。當然人性界線與生存本能，孰重孰輕，本來就係爭議所在。但作為一個衣食豐足的城市人，前幾日先同好朋友家明夾完band，今日要我食咗家明？有少少人性都食唔落。正如我剛剛先同隻狗一齊游完水，狗唔止係我朋友，更加係家人，然後轉頭同我講廣西玉林有狗肉節？唔好意思，唔係文化差異問題，而係冇可能接受到。
呢幾日最深刻的一句反駁，撐狗肉節的人咁講喎：「你食豬肉食牛肉，點解唔食得狗肉？」呢句說話好難駁，因為一講就將動物分了階級，好高明。但我想回應一句：「你可以食狗肉，點解食人肉又唔得？」狗的確唔比豬牛高級，同樣人都唔比狗高級，一樣係朋友，點解狗可以食，家明唔可以食？可能狗唔係你朋友，咁家明都唔係我朋友，我又食唔食得？
當然食豬食牛都係唔啱，所以食肉時從來唔覺得係件值得炫耀的事，我都喜歡活生生的豬、牛、雞、羊，所以呢一句殺埋身，最自然的反應係覺得guity。我恨自己冇食素的勇氣（希望將來會有），但起碼，我唔會因為食牛肉豬肉而去舉辦，或參加，一個所謂牛肉節、豬肉節。以屠宰為榮的節日，除了突顯人類的惡劣，究竟有何存在意義？
從地球出現人類開始，就係其他動物的災難，例如中國人就係一個出名背脊向天就食得的民族，出現在中國境內的物種，應該通通都被食過。食有分需要與享受，以前人類食唔飽，有乜食乜，都尚算是為了生存的動物本能，但如今中國泱泱大國，物質豐盛，食用非需要的動物就只在炫耀自己的享受，難道去狗肉節的人通通係餓鬼，唔食狗肉就會餓死？亦唔係只針對中國，韓國一樣食狗肉，所以我到今日都堅持唔會踏足呢個地方，因為實在難以認同呢種文明倒退。所以廣西都唔會去，好彩都冇乜機會要去。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
