【now.com】「你鍾唔鍾意睇胡杏兒做戲？」講真，一半半，輕鬆搞笑的《我的野蠻奶奶》演得抵死過癮，在《怒火街頭》演正直敢言的律師王思苦也恰到好處。不過在《亂世佳人》的招牌囧樣實在不敢恭維，而為她奪得視后榮譽的《萬凰之王》，也只能將重重心計擺在臉上，陰險得表面。鍾意好，唔鍾意好，今年7月，杏兒便約滿無綫簽約蕭定一旗下，剩下幾套倉底貨，恐怕都難見天日。據知簽新公司後會轉去影壇發展，並繼續接拍內地劇。以後想睇定想鬧，一係俾錢入場，一係聽她國語配音。
另謀高就，表面看是想有更好發展，不過這三尺積雪，早在陳國強4年前入主無綫後便埋下，因為內裡正上演一場真人版《萬凰之王》，只可惜杏兒無緣成為萬凰之王，反一直被投閒置散，台慶劇冇份，而受力捧的就變成徐子珊和高海寧。無綫的一線小生花旦相繼離開已不是新鮮事，事關外面的世界實在太大，就算不向外，向北移都夠你慢慢開發。在香港，即使簽部頭，斷集計，最巴閉的張智霖和吳鎮宇，都只能叫價1萬左右，但內地劇一集便可以收25萬，差天共地。除了拍劇，內地有大量綜藝節目，個個都水頭充足，就以杏兒將會為一個綜藝節目擔任嘉賓為例，13集就已經大收600萬，還要是人仔。換轉在無綫，上綜藝節目多為義務性質，有利是或車馬費收已算不俗。
所以你見到無綫在已獨霸香港電視市場下，仍繼續對其他大氣電波虎視眈眈，希望進一步掌握頻譜控制權以限制外來者入侵的做法，實在將市場想得太單一和簡化。冇錯，以今時今日TVB的規模，加上亞視步入最後倒數階段，在香港可謂已無敵，不過競爭對手其實早就不是本地市場，它們可以是南韓，可以是美國，因為有網絡，過去可以播外購劇造勢，但網上點播已經將這優勢吃掉。而人才方面更要面對來自中國的湖南衛視浙江衛視的雄厚財力，所以讓你再霸，都只能做到地頭蟲，很難重拾80年代過江龍的光輝。
當然，以TVB在香港獨大的影響力，你能受寵或有一部劇跑出，身價已標升，又再以張智霖個案做例子，當他拍完《衝上雲霄II》後，Cool魔形象大紅，不單廣告源源不絕，連帶電影片酬也由200萬跳升到300萬，非常和味。不過這種跳板關係，就令演員跟公司只限於講金不講心。今天胡杏兒以2,500萬包薪3年遠走高飛，難保他日就到高海寧同徐子珊。屆時就算要救亡，找義氣仔女相助，都只能是捱義氣那種。
文：余建
〈娛樂乜乜乜〉
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。逢星期一至五刊登。
