〈娛樂乜乜乜〉Beyond 今天只有殘留的軀殼

【now.com】今年是黃家駒逝世22周年，有報道指葉世榮入紙紅館開紀念演唱會，不過黃家強已斷然拒絕，睇怕都搞唔成。

其實家駒都走了22年。剩下3人，家強阿Paul永遠面左左，早一、兩年還在微博開火，將多年心結赤裸地公開，例如15周年紀念騷，阿Paul世榮主人家身份，只各唱得兩首歌，難免會質問「點解點解／點解冇份當主角《點解點解》」？而去年家強的微博萬言文，又爆黃貫中親口對他說不想再養世榮，這大概是塵世間最傷人的說話之一。所謂兄弟情，在家駒死後就一分一毫都計到足，仲可以如何維繫？

但世榮EQ應該是宇宙最高，22周年依然可以繼續做和事老，可惜將佢夾在中間的不是普通人。一人一邊「你話唔俾面／佢話唔賞面／似為名節做奴隸《俾面派對》」，但世榮依然想打破隔膜，仲有個無法實現的願景「舊日的知心好友何日再會／但願共聚互訴往事／一起高呼Rock n' Roll《再見理想》」。

其實男人老狗，真的不用搞太多嘢，越將家強阿Paul拉埋一齊，就越會將衝突浮面。你知歌迷幾傷心嗎？歌迷至今仍然憧憬以前四子並肩齊上的日子，奈何事實明明是有你冇我，何苦要一而再，再而三重新撕開傷疤？倒不如唔好再搞紀念騷，或起碼唔好再由三子去搞。

唔搞紀念騷對三子也是好事，他們好不容易才「越過痛楚／戰勝心魔覓自我《戰勝心魔》」，擺脫家駒的陰影獨立發展，但是每到紀念年又要重新被人拿出來跟舊Beyond比較一番，你以為好受嗎？就繼續自己做自己事，感情反而會好轉吧。

真的，就算又再一齊上到台，也不是Beyond了，而只是3個Beyond的舊成員，為一個已逝世的老朋友被強逼上台，表演幾十分鐘虛偽的「天空中闊步共行／拋開恩怨共鬥爭《是錯也再不分》」而已。想念家駒的人自有他們的紀念方式，不要讓創傷再延續下去好嗎？

利申：我是Beyond歌迷，從《秘密警察》開始。有些人有些事，留在回憶已足夠。

歌迷至今仍然憧憬以前四子並肩齊上的日子，奈何事實明明是有你冇我。（互聯網圖片）

剩下3人，家強（右）阿Paul（左）永遠面左左。（互聯網圖片）

其實真的不用搞太多嘢，越將家強（左）阿Paul（右）拉埋一齊，就越會將衝突浮面。（互聯網圖片）

世榮（右）EQ應該是宇宙最高，22周年依然可以繼續做和事佬。（互聯網圖片）

文：魯連

〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。