【now.com】TVB放聲氣想將《大時代》拍成電影版,網民哀鴻遍野。觀眾冇信心絕對可以理解,因為早兩個月才睇完一部冇飛機的《衝上雲霄》,任誰都不想在短期內,再睇到一部可能冇股票的《大時代》。加上翻拍舊經典向來難成功,以《古惑仔》為例,兩年前再拍,演員不同,時代不同,加上原版已深入民心,觀眾在無意識下已自動拿兩者來比較。
經典之所以是經典,在於它的無可替代。而《大時代》之所以是經典之最,演員陣容固然是好,韋家輝才是靈魂所在,是他賜給角色血和肉。以劉松仁為例,他做方進新出神入化,被老闆炒魷魚跪地哀求一幕,睇一次喊一次,但為何他近年的角色如此重複而平淡?就是因為劇本質素不足,局限了演員發揮,此為近年電視劇的通病。
那樣的話,既然杜棋峯有意監製,再找韋家輝寫劇本,豈不是天作之合嗎?
這不是沒可能,但首先韋家輝要肯將自己的金漆招牌拿出來作賭注。對TVB來說,拍電影版是條財路,比留起來每幾年股票大起大落時重播,拿出來拍,肯定更有著數。《衝上雲霄》拍到咁「好」,大陸都收8千萬人仔,《大時代》收一、兩億絕對冇問題。但韋家輝是創作人,對他來說《大時代》的電視劇版已經完美,23年後拍一個新版本,就算拍得再好也沒有意義;拍得差,就沾污了舊作。如果我是韋家輝,除非好等錢使,否則一定不會拍。
但當然我不是韋家輝,就假設他肯拍,那演員陣容呢?TVB有意找回鄭少秋和劉青雲,重做丁蟹和方展博,聽起來可行。方家3個女,陳凱琳做其一,我估計是李麗珍的角色;而岑麗香做慳妹,算有說服力,但可能要改一改劇本,改成慳妹是外國讀完小學回流,所以有口音。劉松仁、曾江、羅樂林可演回方進新、龍城邦和葉天。那玲姐呢?諗起就驚,求神拜佛千萬不要給我估中是楊怡。最難換是江毅做的陳萬賢,那種尖酸刻薄得佢做到,找外援吧,盧海鵬應該可以。現在開拍大製作,十成是合拍片,正常會有個大陸女角,岑麗香做慳妹,再搵個大陸女星做龍紀文,合情合理。
以上的選角未算面目全非,最多只是半新半舊。但最恐怖的部分來了,丁蟹4個仔,誰演?肯定是二線以下,正在上位的新生代演員,照TVB近年力捧名單,當中又可以演奸角的,呼之欲出了。羅均滿、梁烈唯、敖嘉年、沈震軒,仲唔係你4隻鐵腳?就算爆冷,也不出鄭俊弘、狄易達、王梓軒這幾個愛將。嗯……雖然只是斷估,但已冒冷汗,我寧願睇多次《衝上雲霄》電影版,冇咁鬱悶。
文:魯連
〈娛樂乜乜乜〉
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。逢星期一至五刊登。