【Now.com】Insta360 X4 推出近一個月，憑住360影片提升至8K解像度，吸引唔少玩家嘅目光，正當網上一面倒讚 X4 點正、點靚、點好玩，有YouTuber用 X4 到台灣拍片就出事，回港發現喺電腦和手機上用Insta360 官方軟件竟然開唔到 X4 嘅影片！彈出 Error !
YouTuber 情Sir 拍片分享呢段恐怖經歷，話說佢早前去台灣拍攝試機片，原本用 X4 拍攝第三身角度，直言喺香港用 X4 影過好多片都無問題，所以對部機好有信心，唔使再好似以前咁帶 X3 加部 Insta360 ONE RS 做後備。
點知日前一個深夜，電腦用Insta360 官方軟件 Insta360 Studio 開唔到 X4 嘅file，於是喺 Insta360 官網CS留言說明遇到嘅問題，情Sir 第二天見Insta360 仍未回覆，就打電話畀香港代理查詢，對訪叫佢拎部機 (X4) 嚟，維修預三個禮拜至一個月，非常心急嘅情Sir 就苦惱，豈不是成個月唔可以拍片?! 定要唔要買多部 X4！但佢憂慮如果買多部 X4 有相同問題，到時點算？擔心如果問題解決唔到，之後拍開箱片要搵camman拍攝，成本會增加唔少。
整日為開唔到 X4 file而煩惱嘅情Sir 突然靈機一觸，試用Premiere Pro 開 X4 files，竟然畀佢成功咗，佢形容當時心情當堂開心番晒！但世事邊有咁完美，情Sir 發現 X4 影片嘅聲音並唔齊，後段無咗聲，由此推斷 X4 拍攝時files已經炒咗。
情Sir 指自己買 X4，並非因為 X4 可以拍攝 8K 360 影片，而係因為上代 X3 唔太穩定，相信 X4 無咁多bugs，穩定啲所以先買佢，影片質素上 X3 同 X4 因為用相同sensor，情Sir 相信 X3 畫質唔會差過 X4，但如今 X4 竟有咁嚴重bug，以後仲點用？係咪每次都要請camman拍攝？情Sir 深深不忿，希望搵出 crash files 原因，最終佢發現一旦使用 「快速拍攝」Quick Capture 模式就會出問題，後來 Insta360 嘅電郵亦確認，並提點情Sir 「快速拍攝」和「指向增強」(音訊設定) 只可以二揀一，一齊用就會 crash files。
情Sir 感謝 Insta360技術人員協助搵出原因，但一個核心問題廠方未有著墨，就係其他只用手機App、Insta360 Studio剪360片，無Premiere Pro呢個 workaround 嘅用家可以點做，Insta360並無提供解決辦法，協助呢班用家。情Sir 形容 Insta360 嘅bug搞到死file係「無得原諒」，質問產品出廠前係咪應該check清楚！
Photo / YouTube@情Sir開箱 Ching Sir Unbox 截圖
